حكاية "بورسعيد"

بورسعيد مابقاش سعيد
بورسعيد بلد حزين على كل فقيد
بورسعيد بيواسي كل أم شهيد

شعب بورسعيد وجعته ضربة الغدر
والاتهام والتخويـــن والمقاطعة والهجـــر

ليه يامصريين...؟؟
ده إحنا البواسل الأحرار
إحنا اللي كنا بنرمي نفسنا جوه النـــار

إحنا بلد الكفاح والنضــــال
إحنا اللي حاربنا عشان نرجع أرضنا من العدو في 73
إحنا اللي شاركناكم ثورة يناير 25

يـــــامصريين فوقوا...!!
دي مؤامرة دنيئة -- أهالي بورسعيد بريئـــة

مهما كبرت دايرة منافستنا -- عمر الدم ماهيكون لعبتــــنا

رسالة مواساة من ميناء الألم نبعتها لأهالي ألتراس "الأهلــــي" في سفينة شراعها أسود في رحــــلة صــامتة تنعيكم في أكبر وأوجع كارثة

----------------------

نهى جمال سليمان

أنا بعشق البحــــــر

وبسرح من تاني أنا وفنجان قهوتي قدام الماية

ماهو من بعدهم  بقيت وحيدة في دنيتي

وبقى البحر هو رفيقي وأحلى صحبتي

بشكيله همي ويشاركني ألمي وفرحتي

ساعات بيثور وبيضايقني بالغموض

لكنه فاهمني وحاسسني ومعايا طول اليوم

وبرجع من تاني أسرح وأعيد الذكريات

ماهو أنا بعشق البحر وبيني وبينه قصص وحكايات

ضي القمر بليل بيديني الأمل

ونور البواخر من بعيد بيقولي كل بعيد هيقرب في يوم

وكل ضلمة من بعدها بيجي الشروق

----------------------------------

نهى جمال سليمان

الألف ميل...

هتيأس لا .... قوم يلا ماتستسلمش

هتقفل على نفسك لا ... قوم يلا ناجي ربك

الألف ميل في السبق بتبدأ في خطوة برجلك

وأنت بدأت الخطوة وقربت من هدفك 

طب خد نفسك .. رتب أفكارك .. عيد حساباتك

افصل شوية .. اهدأ حبة

وارجع من تاني كمل مشوارك

----------------------------------------

نهى جمال سليمان

Pause....Play

ساعات كتير الدنيا بتتقفل في وشنا..بنحس إننا لوحدنا.. بنفقد كل حاجة .. بنحس إن إحنا من غير أصحاب من غير أحباب حتى أهلنا بنحس إنهم بعيد عننا.. بنفقد الأمل والرغبة في الحياة .. حتى الحاجات اللي بنحبها وقتها مابنحسش بطعمها ماهو إحنا تعبانين بجد وموجوعين ويمكن مجروحين.

بنشوف الدنيـــا سودا ومفيش غير الدموع هي اللي بتكون لسان حالنا وقتها. بنحس إن إحنا مخنوقين عايزين نصرخ بس مفيش صوت.

بتسأل نفسك ليه أنا ؟؟

اشمعنى دايما بيحصلي كده؟

ليه كل حاجة حلوة بتفرحني بتضيع مني ؟

خسرت حبيب - صديق - جار - رفيق ؟

خسرت شخص عزيز عليك ومش هتقدر تشوفه تاني لإنه مات ؟

خسرت شغلك اللي كنت بتحبه ؟

خسرت سنة من عمرك عشان رسبت في دراستك ؟

خسرت البطولة ويمكن تكون خرجت من التصفيات ؟

مش هقولك اقلع الوش المكشر ده في ثانية وبدله بوش مبسوط ولا هكلمك عن الأمل والنص المليان من الكوباية ولا هقولك البس نضارة وردي أو حتى لانسيز :)

لكن هقوووووووووولك:

ربنا وحده سبحانه وتعالى عالم بحالك وباللي جواك وإنه سبحانه خير من يدبر لنا الأمور.. ربنا وحده هو اللي بيرزق وبيغفر وبيرحم فيــــــــــارب قل لأمنياتنا كوني فبأمرك تكون .

وبعدين ماهو لازم نتعب شوية عشان نعرف نستمتع باللي هنجنيه..فكل اللي بيجي بلا تعب بيروح بلا تعب.

يعني لولا الفشل عمرنا ماهنحس بطعم النجاح

ولولا الدمعة ماهنعرف حلاوة الضحكة والبسمة

ولولا الوجع ماهنفهم معنى الراحة

ولولا المرض ماهنقدر قيمة الصحة

ولولا البعد ماكنا هنحافظ على الغاليين بعد اللقا

ولولا الوحدة والغدر ماكنا هنعرف معنى الصديق الوفي

يــــــــــلا اعمل  " Pause "  مش  "Stop"   وراجع حساباتك

في الدنيا لسه حاجات حلوة معشتهاش

العمر بكرة مش إمبارح

وإن خفت من المحاولة يبقى مش هتوصل في يوم للفرحة

وماتنساش دايما استعن بالله ولاتعجــــــــــــــز

--------------------------------

نهى جمال سليمان

شخابيط

حيـــاتنا ممكن تتلخبط لكنها مابتقفشي


الأمل ممكن يقل لكنه مابيموتشي


الحزن يبوجع لكنه مابيدومشي
 

الصحبة الصادقة بتشغلها الدنيا لكنها مابتبعدتشي


الصحة نعــــمة كبيرة ماتتعوضشي


وحياتنا ♥بالناس الحلوة♥  ماتكملشي


وأيامنا اللي جاية أحلى بس إحنا مانستعجلشي

---------------------------------------------

نهى جمال سليمان

صندوق الحنين

النهاردة كنت قاعدة زهقانة حبتين
قلت افتح صندوق الذكريات والحنين
لاقيت فيه حاجات عدى عليها أيام وسنين

لاقيت فيه الخاين والأمين
لاقيت ناس كانوا عاملين فيها طيبين وبمرور الوقت بان معدنهم وطلعوا كدابين
ولاقيت ناس تانية كل اللي بينا كلمة أو كلمتين
ومع كده كانوا أول اللي وقفوا معايا وكانوا ليا مساندين
شجعوني وبصدق نصحوني وبقوا صحبة السنين
ولاقيت اللي كانوا لابسين مية وش دول فعلا منافقين
وبرضوه لاقيت اللي طلعوا جامدين ومحترمين

كل ده ولسه فاتحة صندوق الحنين
صندوق مليان بذكريات أيام وشهور وسنين
شفت فيه ناس كتيرة ياما..صحيح أنا لسه نونو بس عمر الصندوق أد عمري مرتين

أيام كانت صعبة أوي مابين فراق وألم ودمعتين
أيام قلنا فيها مستحيل لأحلامنا نكون محققين
أيام اتخنقنا فيها وبالأسود كنا للحياة باصين
وأيام تانية حلوة جدا ولكل حاجة واصلين
أيام مليانة نجاح وفرحة وحب وحنين
أيام وسط الأهل والأصحاب والجيران وكل الغاليين

وعرفت وقتها إن الدنيا لازم تبقى كده بلونين
يوم اسود عشان نعرف قيمة الأبيض من غير تزيين
وناس وحشة عشان نعرف قيمة الناس الحلوة ونكون عليهم محافظين
وبرضوه لسه فاتحة صندوق الحنين..

 

--------------------

 

نهى جمال سليمان

قالوا عن حجابــــــــــي!!

سيقيدك

سيخفي جمالك

سيقتل جاذبيتك

سيهدد مستقبلك

سيوقف طموحاتك

سيربكك في سيرك

سيمنع تقدمك

سيبعدهم عنك

فاخلعيـــــــــه

فأنتي مازلتي صغيرة عليه


قلــــــــــــــــــــت :

أليس هذا أمر ربي
وبه يكتمل ديني
و يقربني من ربي
ولحكمة ما فرضها علي
ومايدريني كم من العمر سأعيش
حتى ألبسه في كبري
فما علي سوى الطاعة والأمتثال
كي أكون بإذنه من أهل الجنان

------------------------

نهى جمال سليمان

قلوب تنزف في صمت

• قلب أحب في الله وأخلص بصدق وتمنى وسعى الوصول لكن الظروف اتفقت مع الأقدار ورسمت النهاية بالفراق والرحيل .. فرحل بقلب ينزف في صمت

 

• قلب فقد أبويه ففقد الدفء والحنان ومعهما ذهب الأمان فأصبح الدمع والحنين رفيقا الحياة.. فعاش يتيما بقلب ينزف في صمت

 

• قلب عرف معنى الصداقة وحافظ على الميثاق بالوفاء والأمانة لكن طعنات الغدر من شبه الصديق كانت أقوى ومزقت ميثاق الصداقة .. فرحل خائبا بقلب ينزف في صمت

• قلب عجوز أرهقه النسيان . وآن له الأوان ليرتاح من هم السنين ويشعر بحب كل إنسان بعد أن أتم مهمته وأوصل أمانته لبر الأمان , لكن تأتي مشاغل الحياة لتفرق بينه وبين أبنائه وفي محطة اليأس والألم يصبح وحيدا وللرحيل منتظرا فينتظر الموت بقلب ينزف في صمت

• قلب أتعبته الغربة والترحال واشتاق للأهل وتراب الوطن لكنه عندما عاد صدمه الواقع والحياة فهناك اختلاف بين الآن وماكان, فلم يستطع التأقلم مع تغير الوطن فضاع العمر وضاع الوصل وعاش عمره مغتربا وعاد لوطنه مغتربا بقلب ينزف في صمت 

 

----------------------------

 

نهى جمال سليمان

رسالــــة إلى نفسي

إلى نفسي الحبيبة:

أرسل إليكي رسالة ( لوم) لكل تقصير قصرتيه في حق الله وكل ذنب أذنبتيه -- فتوبي إلى الله :)

أرسل إليكي رسالة (عتاب) وبقدر المحبة ♥ يأتي العتاب فأعاتبك على كل خطأ ارتكبتيه في حق غيرك أو أغضبت به غيرك - فأنت أنقى وأطيب من ذلك فما أجمل اعتذارلك لهم

أرسل إليكي رسالة (اعتذار ) اعتذر فيها عن أي مرة أسأت فيها إليكي أو لم أفكر قبل التصرف وتسرعت في قراراتي

رسالة (تهنئة) أهنئك بكل إنجاز انجزتيه وكل تحدي نجحتي فيه وعلى كل ماوصلتي إليه وعلى طموحك وإرادتك فابقى هكذا دائما :)

رسالة (مواساة) أواسيكي على فقدانك احبابك وادعو الله لكي بالصبر وتذكري قوله تعالى " وبشر الصابرين " :(

رسالة  (تذكير) بأنك لست خالدة في هذه الدنيا فسامحي واصفحي لإننا بشر :)


هذه كانت رسالتي لنفسي -- فإذا أردتم إرسال رسالة لأنفسكم فماذا ستقولون ....؟؟؟

---------------------------------------

نهى جمال سليمان

مكبــــوتة

حاسة إني مكبـــــوتــــة 

حزينة على مبسوطة

مع أهلي وصحابي عايشة

بس قلبي عايش في غربة

حنين لحكاوي قديمة من سنين كتيرة

بضحك بس من غير صوت

وباأبكي بس من غير دموع

 لحظـــات الأمل بقت جرعات ألـــم

دبلت البسمة وراح النــــور

وأيامي بتعدي وأنا لسه بحاول أعيش

بحاول أدور على حبة نور

جايز في يوم أوصل وجايز أضل الطريق

 

--------------------------

 

نهى جمال سليمان

 

طوابير وحكــــاوي

 

يوم لذيـذ مليان حاجات غريبة ومواقف أغرب وشوية إفيهات!

-----------------------------------

صحيت من النوم كسلانة جدا الساعة 7 ولإني مش بحب الصحيان بدري قلت خلاص بقى مش هنزل -- بس بعد دقيقة نطيت من السرير وقلت لأ لازم انزل.. ودم الناس اللي ماتوا والعيون اللي راحت-- ودي اللحظة اللي بقالنا كتير بنتمناها بلاش كسل يلا وماتفكريش في الساقعة وقمت وتوكلت على الله :)

طبعا قبل ماأنزل أخدت قلمي وبطاقتي وافتكرت فيلم اللمبي بتاع مطويتك في جيبك ومذارتك في راسك - المهم نزلت والحمدلله لجنتي كانت في مدرسة أنا كنت اعرفها من قبل فمتهتش زي كتير من صحابي :) اتصدمت في الأول من طول الطابور بس ارجع تاني أقول لنفسي مش ده النظام اللي دايما كنتي بتنادي بيه في أي مكان تدخليه - الوضع كان عامل وكأني في امتحان ثانوية عامة -الله لايعدها- ورق ومذكرات وكله بيسٌمع لكله رمز كذا وحزب كذا – ورقم" الجلوس " قصدي اللجنة .

وقفت وبسرعة بدأ رغي البنات - دي تتعرف ودي تسأل ودي تستفسر - يوووووه بقى أنا مش فايقة لرغيكم عالصبح أنا زماني دلوقتي نايمة.
المهم واحدة بتقولي لوسمحتي يابنتي هو أنا ممكن انتخب الحزب اللي فيه الجنزوري؟
بصتلها بصة كلها استنكار وقلتلها الجنزوووري !!! جنزوري مين بس ياحاجة - وحاولت أفهمها الأحزاب اللي موجودة وخلص الحوار والحمدلله.
وواحدة بتقولي بقولك هو حزب ال___ إيه رأيك فيه ؟؟  قلتلها ده رأيك أنتي شوفي هو مناسب توجهاتك وأيديولوجيته عاجباكي ولا لأ ؟ بصتلي وقالتلي طب هتنتخبي أنت مين؟ قلتلها حزب ال___ قالتلي بيقولوا عليه وحش بلاش ده خليكي في ده – قلت في نفسي دي هتوجع دماغي بقى – قلتلها بصي اعملي اللي أنتي عايزها وسيبيني أنا كمان اعمل اللي انا عايزاها خلينا نطبق الديموقراطية .
" هو مفيش غيري في الطابور بقى ولا إيه " بقول لنفسي ..  وبعدها بشوية لاقيت واحدة بتقولي هو حزب الوسطية المعتدلة رمزه إيه؟؟
قلتلها بصراحة أول مرة اسمع عنه بصي مفيش حزب اسمه كده بس في حزب اسمه الوسط وحزب اسمه العدل لكن الميكس ده بصراحة لسه ماوصلنيش – ضحكت وقالتلي طب ممكن تفهميني – بدأت أقولها اللي أنا فاهماه وقلتلها في الآخر بصي الرأي رأيك ده صوتك اعملي اللي أنتي مقتنعه بيه — ابتسمت وشكرتني ومشيت.

وفقت وصحصحت بقى بعد كل ده - وبدأ يتكلم معايا بنوتين كانوا قدامي
شوية وسألت فين الشرطة بقي اللي قالوا عليها؟؟
دقايق ولاقيت شرطة مدخلين الصناديق وبعدين بقول طب فين الجيش ياجماعة شوية ولاقيت ظابط جيش داخل المدرسة وقلتها بتريقة في الاخر يبقى مش فاضل غير المرور وتصدقوني لو قلتلكم إنى لاقيت 3 منهم ماشين في الشارع -- تقريبا ده شارع الامنيات ولا إيه؟
المهم جيه الدور ودخلت الحمدلله وفجاءة لاقيت طابور تاني قدام اللجنة وبعدين يقسمونا بعد الطابور طابور - يوووو ده واضح أنه انتقام لطوابير ثانوي اللي كنت بزوغ منها - في عز الوقفة تلاقي ستات عواجيز أوي بجد منظر رائع—وفي ستات طالعة تقول عقبال مانتجمع كده في عرفة, وواحدة خارجة تقول ألف مبروك — للحظة سرحت وقلت ياااا الشعب المصري ده بجد غلبان وطيب أوي ولما بيصدق إن حاجة تحصل تفرحه .

دخلت وطبعا مش مستوعبة لسه اللي بيحصل بس كنت مبسوطة لاني حاسة بحرية ومش خايفة من حد — وأنا بمضي جنب اسمي كان لون قلمي مميز شوية قلمي كان أحمر
قالي قلم احمر يااستاذة ؟؟؟ قلتله مش المهم أنه قلم "بصوت حاد"
قالي براحتك أنــا بسأل بس اتفضلي الورق أهو
اخترت وخلصت وبعدين ده موقف تاريخي يعني زي ماأصحابي عارفين عني لازم يتحط للحدث ده صورة في ألبومي
المهم طلعت الموبايل وبسأل واحد من اللي قاعدين ممكن صورة يعني ده حدث جديد ولسه هكمل لاقيته بيقولي طبعا ياآنسة طبعا هاتي واقفي هنا كده –قلت ياااا طب الحمدلله أنا كنت فاكرة أنه هيتريق عليا واتصورت وشكرته وحطيت صباعي في حبر لونه أزرق كان نفسي يكون أحمر بس يلا كفاية عليهم لون القلم.

وخرجت وافتكرت خالد سعيد فجاءة ودعيت ربنا بالرحمة له ولكل اللي ماتوا
وبطريقي على باب المدرسة وأنا خارجة كان في عسكري عمال يقول جملة –قلت يااا هي مش الفلول ومصطلحاتها المفروض إنها انتهيت
كل سنة وحضرتك طيبة --- أد إيه بتستفزيني لإنكم عارفين مضمونها إيه..

بجد كانت تجربة مميزة ويوم جامد والمهم أني عبرت عن رأيي مش مهم مين هيكسب في الآخر المهم إن كلنا نحترم رأي بعض لإن أهلي انتخبوا حد وأصحابي انتخبوا حد تاني وكلنا مختلفين عن بعض بس الأهم بجد إنه نحترم رأي بعض وبلاش نخون بعض كل واحد فينا أياَ كان اتجاهه فهو أكيد همه في المقام الأول مصلحة مصر – وأحلى حاجة بقى إن نسبياَ نسبة الثقافة السياسية زادت شوية عند بعض الناس وأنا كمان بصراحة لإني قريت كتير أوي الفترة اللي فاتت فتشكل وعي لابأس به -- فالنصر لمصر.. :) 

وعقبال انتخابات الرئاسة ....
وربنــــا يسترهــا عليكي ياأم الدنيا الأيـــــام اللي جـــــاية

------------------------------------------------------ 

نهى جمال سليمان

حكايتنا أنا وأنت...

في كل شارع وفي كل حارة
ناس غنية وناس حيارى
حكايتنا أنا وأنت حكاية ثوار

شعب كان مغلوب على أمره
شعب قرر يتحدى وبدأ مشواره

حكاية جيل قرر التغير
جيل رافض يعيش ذليل
مابيحلمش غير بالقليل

حرية وكرامة وعدالة اجتماعية
مش تلهوه بماتش وكام اغنية
حكايتنا أنا وأنت حكاية ثوار

-------------------------
نهى جمال سليمان

بسيطة لكـــــن مستهلة

شكرا كلمة بسيطة أهديها إليكم
شكرا للنصيحة الصادقة والمعلومة والخبرة
شكرا لثقتكم بي وتشجيعكم المتواصل

Thanks " a simple word I can give for you "
Thanks For supporting , Learning . Advising , Training & Trust in my abilities


Merci "un simple mot que je peux donner pour vous"
Merci de soutenir, d'apprentissage. Conseil, la formation et la confiance dans mes capacités



شكرا بجد لكل اللي وقف وواقف وهيقف معايا :)

------------------------------

نهى جمال سليمان

جنون الميــزان

فرحانة بس جوايا أحزان..
مطمنة لبكرة بس خايفة من غدر الزمان
طموحي كبير بس حواليا  بعض المحبطين.
فيا قوة في وقت ضعفي بتبان..
والنجاح بعد الفشل بيبقي جنان..
بضايق من غدر الناس في وقت انتهى فيه الأمان.
أحاسيس كتير متناقضة في نفس الوقت والمكان..
قلبي ساعات بيتقبض ومن بعد الضيقة بيجي فرج الرحمن..
ده جنان بقى ولا ده طبع الميزان!!!

---------------------------

نهى جمال سليمان